काठमाडौँ – संयुक्त अरब इमिरेट्स (यूएई) सरकारले विभिन्न जेलमा रहेका १६६ जना नेपाली कैदीहरूलाई आममाफी प्रदान गरेको छ। मुस्लिम समुदायको पवित्र पर्व रमजान तथा ईदको अवसरमा यूएई सरकारले विभिन्न मुलुकका कैदीहरूलाई आममाफी दिने परम्परा अनुसार नेपाली कैदीहरू पनि छुट पाउनेमा परेका हुन्।
नेपाल सरकारको विशेष अनुरोधमा आममाफी
अबुधाबीस्थित नेपाली दूतावासका अनुसार नेपाल सरकारको विशेष अनुरोधपछि आममाफीको प्रक्रिया अघि बढाइएको थियो। परराष्ट्र मन्त्रालयले मानवीय आधारमा आममाफीका लागि यूएई सरकारलाई आग्रह गरेको थियो। यूएई सरकारले सकारात्मक रूपमा उक्त अनुरोध स्वीकार गर्दै १६६ जना नेपाली कैदीहरूलाई रिहा गर्ने निर्णय गरेको हो।
नेपाल–यूएई सम्बन्ध थप मजबुत बन्दै
परराष्ट्र मन्त्रालयले यस आममाफीलाई नेपाल र यूएईबीचको सौहार्दपूर्ण सम्बन्धको प्रतीकका रूपमा लिएको छ। नेपाली नागरिकहरूलाई कानूनी सहायता प्रदान गर्न दूतावासको सक्रिय भूमिकाले पनि यस निर्णयमा महत्त्वपूर्ण योगदान पु¥याएको बताइएको छ।
अब के हुन्छ?
आममाफी पाएका नेपाली कैदीहरूलाई स्वदेश फर्काउने प्रक्रिया सुरु भइसकेको छ। नेपाली दूतावास र नेपाल सरकारबीच समन्वय गरी उनीहरूलाई छिट्टै नेपाल ल्याइनेछ।
यूएईमा कार्यरत नेपाली कामदारहरू कानूनी झमेलामा पर्न नदिन नेपाल सरकार र सम्बन्धित निकायले सचेतना कार्यक्रम सञ्चालन गर्ने योजना बनाएको छ।
