काठमाडौ — राजधानीको तीनकुने क्षेत्रमा भएको राजावादी प्रदर्शनमा तोडफोड र आगजनीको घटना घटेको छ। प्रदर्शनकारीहरूले सरकारी सम्पत्तिमा क्षति पुर्याएका थिए। घटनामा संलग्न थप ६ जनालाई प्रहरीले पक्राउ गरेको छ। पक्राउ पर्ने व्यक्तिहरू विभिन्न जिल्लाबाट आएका छन्, जसमा सर्लाहीका अमित साह (२२ वर्ष), सुनसरीका सुमन कार्की (१९ वर्ष), बर्दियाका हेमराज थारु (३४ वर्ष), धादिङका दिवस बोगटी क्षेत्री (२७ वर्ष), काभ्रेकी अनिता कुँवर (३० वर्ष), र सिन्धुपाल्चोकका कुमार तामाङ (३० वर्ष) समावेश छन्।
प्रहरीले पक्राउ परेकाहरूलाई आपराधिक उपद्रव र संगठित अपराधको आरोपमा अनुसन्धान अघि बढाएको छ। यस घटनामा संलग्न व्यक्तिहरूसँग राज्यविरुद्धका अपराधका प्रमाणहरूको अनुसन्धान पनि भइरहेको छ।
अब सम्म राजावादी आन्दोलनसँग सम्बन्धित ७३ जना व्यक्तिहरू पक्राउ परेका छन्। यसअघि राप्रपाका वरिष्ठ उपाध्यक्ष रवीन्द्र मिश्र, महासचिव र सांसद धवलशम्शेर राणा लगायत ६७ जनालाई पनि पक्राउ गरिएको थियो। प्रहरीले भने थप अनुसन्धान गरिरहेको र घटनामा संलग्न अन्य व्यक्तिहरूको खोजी जारी राखेको जानकारी दिएको छ।
राज्यविरुद्धको अपराध र आन्दोलनका घटनाहरूलाई निरुत्साहित गर्न सरकार द्रुत कारवाहीमा जुटेको छ। भविष्यमा यस्ता घटनाहरूको नियन्त्रणको लागि सरकारले कडा कदम चाल्ने तयारी गरेको छ।
