कैलालीको टीकापुर क्षेत्रका किसानले हाटबजारलाई कृषि तथा पशुपक्षी उपज बिक्री गर्ने थलोका रूपमा प्रयोग गर्न थालेका छन् । पछिल्लो समय किसानले हाटबजारमा आफ्नो बारीमा उत्पादित तरकारी बिक्री र आफूले पालेका पशुपक्षी किनबेच गर्ने गरेका छन् ।
टीकापुर नगरपालिका–१ मा कृषि हाटबजार सातामा चार दिन र पशु हाटबजार एक दिन सञ्चालन हुन्छ । हाटबजार सञ्चालनमा आउँदा कृषकलाई सहजतासँगै आम्दानी बढेको छ । कृषि तथा पशुपक्षी उपजको बिक्री थलो सुनिश्चितता हाटबजार नै उपयुक्त स्थान रहेकाले किसानले उत्पादन गरेको कृषि उपजले राम्रो र उचित मूल्य पाउनुका साथै सहजरूपमा बिक्री गर्ने वातावरण मिलेको किसान बताउँछन् ।
किसान मानबहादुर चौधरीले हाटबजारले किसानलाई खेती र पशुपालनमा हौसला मिलेको बताउनुभयो । “उत्पादन भएको कृषि उपज बिक्री हाटबजारमै हुन्छ, थोरै–धेरै जति भए पनि आफैँले लगेर बिक्री गर्न सकिन्छ”, उहाँले भन्नुभयो, “हाटबजारले किसानको अर्थावस्थामा सुधार ल्याएको छ । किसानले कृषिमा भविष्य छ भनेर रुचाउन थालेका छन् ।”
टीकापुरको ब्लक नं ११ र कृषि हाटबजारस्थल गरी दुई स्थानमा साताको चार दिन हाटबजार लाग्ने गर्छ । ब्लक नंं ११ मा मङ्गलबार र शुक्रबार र हाटबजारस्थलमा बुधबार र शनिबार बजार लाग्छ । पशु हाटबजार भने हरेक साताको मङ्गलबार लाग्ने गर्दछ । यसरी हरेक साताको चार दिन लाग्ने हाटबजारमा स्थानीय कृषकले उत्पादन गरेको विभिन्न तरकारी बाली सहजरूपमा ल्याएर बेच्ने गरेका छन् ।
स्थानीय क्षेत्रका पायक पर्ने ठाउँमा हाटबजार लाग्दा किसान सहजै कृषि उपज ल्याएर बेच्ने गरेका किसान राजकुमारी चौधरीले बताउनुभयो । “कृषि उपज बेच्न कृषक र उपभोक्ताबीच जमघट हुँदा यसले कृषि गर्न चाहनेलाई पनि हौसला मिल्छ, साथै ताजा तरकारी खान पाइन्छ”, चौधरीले भन्नुभयो, “हाटबजारमा कृषि उपजदेखि विभिन्न खाद्यवस्तु र स्थानीय परिकार, लुगाकपडासमेत बिक्री हुने गरेका छन् ।”
हाटबजारले स्थानीय कृषकको आयआर्जनमा वृद्धि गरेको छ । घरको करेसाबारीको उत्पादनदेखि लिएर व्यावसायिकरूपमा खेती गर्ने किसानको जीविकोपार्जन र आर्थिक स्रोतका रूपमा हाटबजारले सहयोग पुग्ने गरेको भोजरानी चौधरीले बताउनुभयो । “काममा व्यस्त पनि रहने, उत्पादन बिक्री गरेर जीविका चलाउन सजिलो भएको छ”, उहाँले भन्नुभयो, “अहिले स्थानीय तह, सिँचाइ आयोजना कृषितर्फ लगायतले कृषिमा लागेकालाई अनुदान, औजार सहयोग, प्राविधिक सहयोगजस्ता कार्यसमेत गर्दै आएका छन् । यसले कृषिमा थप आकर्षण बढेको छ ।”
टीकापुर नगरपालिकाको सहयोगमा तीन वर्षदेखि ब्लक नं ११ र हाटबजारस्थल जमरा नदी किनारमा १५ वर्षदेखि हाटबजारका लागि टहरा निर्माण भई सञ्चालनमा आएको हो । हाटबजारमा टीकापुरका वडा नं १, २, ३, ४, ५, ६ र आसपासका पालिका जानकी र जोशीपुर गाउँपालिकाका किसानसमेत आफ्नो कृषि उत्पादन बेच्न आउने गरेका छन् ।
