Breaking राष्ट्रिय समाचार

रामपुरमा राष्ट्रिय भूमि आयोगको केन्द्र स्थापना

Written by janaawaaj

पाल्पाको रामपुरमा राष्ट्रिय भूमि आयोगको केन्द्र स्थापना गरिएको छ । लालपुर्जा वितरण तथा भूमिहीनहरुको लगत अध्यावधिकका लागि कार्यालय स्थापना गरिएको हो ।

राष्ट्रिय भूमि आयोगका केन्द्रीय अध्यक्ष केशव निरौलाले केन्द्रको स्थापना गर्नुहुँदै भूमिहीन दलित, भूमिहीन सुकुम्वासी र अव्यवस्थित बसोबासीलाई लालपुर्जा दिने गरी केन्द्र स्थापना गरिएको बताउनुभयो ।

लालपुर्जा वितरण गर्ने कार्यक्रम असारभित्रैबाट सुरु गरिने उहाँले बताउनुभयो । यसअघिका आयोगका निर्णय र स्थानीय सरकारको निर्णयानुसार नै आयोग अघि बढ्ने बताउनुहँुदै पुर्जा वितरण कार्य रामपुरबाट थालनी गर्ने अध्यक्ष निरौला बताउनुहुन्छ ।

यसअघि चार पटकसम्म भूमिहीन लगत माग भएर छानबिन सकिसकेका ७८३ भूमिहीनलाई पहिलो चरणमा लालपुर्जा दिइनेछ । तत्कालीन गाविस, स्कुल, क्याम्पसले बिक्री गरेका रसिदको भरमा भोगचलन गर्दै वर्षौंदेखि अव्यवस्थित रुपमा रहेका घरजग्गाको लालपुर्जा वितरणका सम्बन्धमा निर्वाचनका बेला चुनावी एजेन्डा बनेका छन् ।

लगत सङ्कलन र जग्गाधनी पुर्जाविहीन नागरिकको अवस्था मूल्याङ्कन भइसकेकाले आयोगको टोलीले प्रक्रिया अपनाउँदै लालपुर्जा वितरण गर्ने नगर प्रमुख रमणबहादुर थापाले बताउनुभयो ।

राष्ट्रिय भूमि आयोग आयोगका जिल्ला अध्यक्ष मोहनलाल गैरेले पहिलेको आयोग र समितिले गरेर अन्तिम चरणमा पु¥याएको फाइलको समितिको टोलीले अध्ययन गरिरहेको बताउनुभयो । टोलीले लालपुर्जा वितरणका लागि खोलिएको सेवा केन्द्रको कार्यालयमा रही भूमिहीनहरुको लगत अद्यावधिक गर्ने उहाँ बताउनुहुन्छ । रामपुर नगरपालिका–५ को वडा कार्यालयको तल्लो तलामा केन्द्र स्थापना गरिएको छ ।

About the author

janaawaaj