काठमाडौं – राष्ट्रिय प्रजातन्त्र पार्टी (राप्रपा)को प्रदर्शनलाई लक्षित गर्दै काठमाडौंमा सुरक्षा सतर्कता बढाइएको छ। प्रमुख प्रशासनिक केन्द्रहरू, संसद भवन, माइतीघर मण्डला, प्रधानमन्त्री निवास बालुवाटार, र राष्ट्रपतिको कार्यालयमा सुरक्षाकर्मीहरूको संख्या थपिएको छ।
काठमाडौं उपत्यका प्रहरी कार्यालयका एआईजी टेक तामाङले प्रदर्शनको सुरक्षा रणनीति तयार गरिएको जानकारी दिएका छन्। उनले विभिन्न स्थानमा सुरक्षाकर्मीहरूलाई परिचालन गरी शान्तिपूर्ण वातावरण कायम राख्नका लागि प्रयास गर्ने बताए।
एआईजी तामाङका अनुसार, यदि प्रदर्शनकारीहरूले निषेधित क्षेत्र तोड्ने प्रयास गरे भने बल प्रयोग गर्नुपर्ने स्थिति आउन सक्ने चेतावनी दिइएको छ। त्यसैले सुरक्षाकर्मीहरूले प्रदर्शनलाई शान्तिपूर्ण बनाउनको लागि निगरानी राख्नेछन्।
यसै क्रममा, राप्रपा अध्यक्ष राजेन्द्र लिङ्देनले सरकारको विरोधमा शान्तिपूर्ण र प्रतिकात्मक प्रदर्शन गर्ने जानकारी दिएका छन्। उनले भने, “हामीले सरकारलाई नडराउन आग्रह गर्दछौं, र प्रदर्शनमा सीमित नेता मात्र सहभागी हुनेछन्।”
राप्रपाले आज बिहान ११ बजे काठमाडौंको बिजुलीबजारमा प्रदर्शन गर्दै राजसंस्था पुनर्स्थापना र हिन्दू राज्यको माग राख्ने जनाएको छ।
यसैबीच, गृह मन्त्रालयले राप्रपाको प्रदर्शनलाई ध्यानमा राख्दै निषेधित क्षेत्र तोड्न नदिने र कानुनी कारबाही गर्ने चेतावनी दिएको छ। मन्त्रालयले सुरक्षा व्यवस्था कडा पारेर कुनै पनि अराजकता सह्य नगर्ने कुरा पक्का गरेको छ।
