काठमाडौं । राष्ट्रिय सभाको शुक्रबारको प्रश्नोत्तर कार्यक्रममा गृहमन्त्री सुधन गुरुङ र भूमि व्यवस्था, सहकारी, संघीय मामिला तथा सामान्य प्रशासन मन्त्री प्रतिभा रावलले सांसदका प्रश्नको जवाफ दिएका छन्। नेपाली कम्युनिस्ट पार्टीका सांसद भुवनबहादुर सुनारले सिन्धुली हिरासतमा श्रीकृष्ण विश्वकर्माको शंकास्पद मृत्यु, अन्तरजातीय विवाहका कारण हुने हिंसा, दलित समुदायमाथिको विभेद तथा मोही किसानको अधिकारबारे सरकारसँग जवाफ मागेका थिए। गृहमन्त्री गुरुङले डीआईजी नेतृत्वको छानबिन समितिको प्रतिवेदनले श्रीकृष्ण विश्वकर्माको मृत्यु आत्महत्याका कारण भएको निष्कर्ष निकालेको र प्रहरीबाट शारीरिक वा मानसिक यातना दिएको पुष्टि नभएको बताए। सांसद सुनारले छानबिनमाथि नै प्रश्न उठाएपछि मन्त्री गुरुङले विषयलाई मन्त्रालयले गम्भीरतापूर्वक लिएर आवश्यक थप अध्ययन गर्ने प्रतिबद्धता जनाए। उनले जातीय भेदभावसँग सम्बन्धित मुद्दाको प्रभावकारी सम्बोधनका लागि नेपाल प्रहरीभित्र ‘दलित सेल’ सञ्चालनमा ल्याइएको जानकारी पनि दिए। त्यसपछि भूमि व्यवस्था मन्त्री रावलले भूमिसम्बन्धी ऐनअनुसार मोहीको हक सुरक्षित रहेको, द्वैत स्वामित्व अन्त्य गर्ने कानुनी प्रक्रिया जारी रहेको र विभिन्न जिल्लाका मोही किसानका समस्याबारे मन्त्रालयले काम अघि बढाइसकेको बताउँदै केही दिनमै प्रतिवेदनसहित थप जानकारी गराइने जानकारी दिइन्।
