काठमाडौँ – नागरिकता छानबिनका क्रममा बर्दियामा ४१ जनाको नेपाली नागरिकता खारेज गरिएको छ। जिल्ला प्रशासन कार्यालय बर्दियाले ३८ जनाको नागरिकता खारेज गरेको छ भने गृह मन्त्रालयले ३ जनाको नागरिकता रद्द गरेको छ।
झुटा विवरणका आधारमा नागरिकता लिएको पुष्टि
छानबिनका क्रममा झुटा विवरण पेश गरी नागरिकता लिएको प्रमाणित भएपछि ती व्यक्तिहरूको नागरिकता खारेज गरिएको जिल्ला प्रशासन कार्यालयले जनाएको छ। साथै, १३ जनाले स्वेच्छिक रूपमा नेपाली नागरिकता परित्याग गरेका छन्।
नागरिकता परित्याग गर्नेमा एक जनामाथि मुद्दा
नागरिकता परित्याग गर्नेहरूमध्ये बाँसगढी-२ की लक्ष्मी शाही (कल्पना थारु) विरुद्ध अदालतमा मुद्दा दायर गरिएको छ। उनले झुटो विवरणका आधारमा नागरिकता लिएको पुष्टि भएपछि कानुनी प्रक्रिया अगाडि बढाइएको हो। तीन लाख रुपैयाँ धरौटी तिर्न नसकेपछि उनलाई कारागार चलान गरिएको छ।
गृह मन्त्रालयबाट खारेज गरिएका नागरिकता
गृह मन्त्रालयले गुलरिया-१२ का भन्साराम भुर्जी, चेतराम भुर्जी र बैजनाथ भुर्जीको नागरिकता खारेज गरेको छ। उनीहरूले २०६३ सालमा नागरिकता लिएको खुलेपछि कानुनी प्रक्रिया पूरा गरी खारेज गरिएको हो।
जिल्ला प्रशासन कार्यालयबाट खारेज गरिएका अन्य नागरिकता
प्रमुख जिल्ला अधिकारीको निर्णयअनुसार पदनाहा-२ का झबरु थारु, मधुवन-७ की श्रीमाया सुनार, ठाकुरबाबा-५ की अनिता थारु, गुलरिया-७ का तिलकराम यादवसहित ३८ जनाको नागरिकता खारेज गरिएको छ।
अदालतको आदेशमा कारागार चलान
बढैयाताल-७ का चेतराम रैदास (सिताराम रैदास) विरुद्ध अदालतको आदेशमा पुर्पक्षका लागि जेल चलान गरिएको छ। प्रमुख जिल्ला अधिकारी शर्माले सम्बन्धित निर्णयहरू अझै अनुसन्धानमै रहेको र आवश्यक कानुनी प्रक्रिया अगाडि बढाइने जानकारी दिएकी छन्।
