काठमाडौं । हिमाल आरोहणका लागि पर्यटन विभागले यो सिजनमा ३६२ जना पर्यटकलाई अनुमति दिएको छ। पर्यटन विभागले जारी गरेको विवरण अनुसार यो सिजनमा १० वटा हिमालमार्फत साढे ४ करोड रुपैयाँ रोयल्टी संकलन हुने भएको छ।
सेप्टेम्बर तेस्रो साता सम्मका लागि मनासलु, पुठा हिमचुली, अन्नपुर्ण ४, थाकर गो इस्ट, धौलागिरी, फुङ्गी, कुम्भकर्ण, अरनिको चुली, अपी र मकालु आरोहणका लागि ३६२ पर्यटकले अनुमति पाएका हुन्।जसमध्ये मनासलु आरोहणका लागि आउने पर्यटकको संख्या उच्च रहेको छ। ३६२ मध्ये यो हिमाल आरोहण गर्ने संख्या मात्र ३०८ रहेको छ।
हिमाल आरोहणका लागि ५४ वटा मुलुकका नागरिकले अनुमति पाएका हुन्। जसमध्ये चीनबाट मात्र ६१ जना आरोहीको सहभागी हुने विभागले जनाएको छ। हिमाल आरोहणका लागि धेरै पर्यटक आउने दोस्रो मुलुकमा अमेरिका रहेको छ। अमेरिकाबाट आउने ३५ पर्यटकले हिमाल आरोहण गर्ने अनुमति पाएका हुन्।
