काठमाडौँ – दाङको घोराही उपमहानगरपालिका-९ खैरा स्थित गणपती प्लाई उद्योगमा आज बिहान भीषण आगलागी भएको छ। बिहान करिब २ बजे लागेको आगो सवा ९ बजेसम्म पनि पूर्ण रूपमा नियन्त्रणमा आउन सकेको छैन।
दमकल र सुरक्षा टोलीको प्रयास
आगो निभाउन दाङ, बाँके, कपिलवस्तु, बर्दिया र रुपन्देहीबाट कूल ९ वटा दमकल परिचालित छन्। साथै, नेपाली सेना, सशस्त्र प्रहरी, नेपाल प्रहरी, वन कार्यालयको अग्नि नियन्त्रक टोली तथा स्थानीय बासिन्दा आगो नियन्त्रणको प्रयासमा जुटिरहेका छन्। आगो बस्तीमा नफैलियोस् भनेर चारैतिरबाट नियन्त्रण गर्ने प्रयास भइरहेको छ।
आगलागीको कारण र क्षति
गणपती प्लाई उद्योग सांग्रिला ब्रान्ड अन्तर्गत प्लाई उत्पादन गर्ने उद्योग हो, जुन करिब ७ बिघा क्षेत्रफलमा फैलिएको छ। उद्योगमा काठ तथा अन्य ज्वलनशील कच्चा पदार्थ धेरै भएकाले आगो नियन्त्रण गर्न कठिन भइरहेको छ। प्रारम्भिक अनुमानअनुसार उद्योग पूर्ण रूपमा ध्वस्त भएको छ। क्षतिको परिमाण करोडौंमा हुनसक्ने बताइएको छ। यद्यपि, आगो पूर्ण रूपमा निभेपछि मात्रै वास्तविक क्षतिको मूल्यांकन गरिनेछ।
प्रशासनको भनाइ
प्रमुख जिल्ला अधिकारी कृष्णप्रसाद लम्सालका अनुसार उद्योगमा ठूलो क्षति भए पनि वरपरका बस्तीहरू सुरक्षित छन्। नेपाल प्रहरीका इन्सपेक्टर कविराज रोकायले समयमै नियन्त्रण प्रयास गरेकाले बस्तीलाई सुरक्षित राख्न सफल भएको जानकारी दिएका छन्।
अहिलेसम्म आगलागीको कारण खुल्न सकेको छैन। अनुसन्धान जारी रहेको प्रशासनले जनाएको छ।
