जापान एयरलाइन्स (जेएएल) ले बिहीबार साइबर आक्रमणको शिकार भएको जनाएको छ। यस आक्रमणका कारण घरेलु र अन्तर्राष्ट्रिय उडानहरूमा ढिलाइ आएको र ब्यागेज चेक-इन प्रक्रिया प्रभावित भएको छ, जसले यात्रुहरूलाई असुविधामा पारेको छ।
जेएएलका अधिकारीहरूले समस्याको कारण पत्ता लगाइसकेको र प्रणालीलाई पुनः स्थिर बनाउने प्रयास भइरहेको बताएका छन्। साइबर आक्रमण स्थानीय समय अनुसार बिहान ७:२४ बजे सुरु भएको थियो, र यसले नेटवर्कको राउटरलाई अस्थायी रूपमा अलग गर्नुपर्ने स्थिति उत्पन्न गर्यो।
यो आक्रमणपछि जेएएलको शेयरमा २.५ प्रतिशतको गिरावट आएको छ। उल्लेखनीय कुरा के भने, यो जापानका विभिन्न कम्पनीहरूमा भएको साइबर आक्रमणको पछिल्लो घटना हो, जसमा जाक्सा र नागोया बन्दरगाह पनि समावेश छन्।
यसअघि पनि २०२३ मा जापानको अन्तरिक्ष एजेन्सी र २०२२ मा टोयोटा आपूर्तिकर्तामा पनि साइबर आक्रमण भएका थिए, जसले साइबर सुरक्षा चुनौतीहरूको जटिलता प्रकट गरेको छ।
