काठमाडौं– भारत र पाकिस्तानबीचको गम्भीर राजनीतिक तथा सुरक्षा तनावको प्रभाव भारतीय प्रिमियर लिग (आईपीएल) क्रिकेट प्रतियोगितामा परेको छ। भारतीय क्रिकेट नियन्त्रण बोर्ड (BCCI) ले बिहीबार साँझ आकस्मिक बैठक बसेर आईपीएल २०२५ सिजन स्थगित गर्ने निर्णय गरेको हो।
बोर्डले जारी गरेको विज्ञप्तिमा भनेको छ कि हालको अस्थिर सुरक्षास्थितिलाई ध्यानमा राख्दै प्रतियोगिता रोकिएको हो। यो निर्णय धर्मशालामा पञ्जाब किङ्स र दिल्ली क्यापिटल्सबीच भइरहेको खेलको दौरानमा आएको हो। तीव्र तनावका समाचारसँगै सुरक्षाको कारण देखाउँदै खेलबीचमै रोकिएको थियो।
खेल स्थगन पछि, भारतीय सञ्चारमाध्यमका अनुसार खेलाडी, अफिसियल र टिम सदस्यहरूलाई तत्काल सुरक्षित स्थानमा सारिएको छ। BCCI ले भनेको छ कि उनीहरूले परिस्थितिको मूल्याङ्कन गरिरहेका छन्, र स्थिति सामान्य भएमा मात्र आगामी खेलहरू सञ्चालन गरिनेछ।
आईपीएल स्थगनको यो आकस्मिक निर्णयले क्रिकेटप्रेमीहरूमा निराशा उत्पन्न गरेको छ, यद्यपि राष्ट्रिय सुरक्षालाई प्राथमिकता दिनुपर्ने भन्दै धेरैले यस निर्णयलाई समर्थन गरेका छन्।
