काठमाडौं । उत्तरी वेस्ट बैंकको जेनिन र तुबास शहरहरूमा इजरायली बमबारी र गोलीबारीमा चार प्यालेस्टाइनीको मृत्यु भएको प्यालेस्टिनी स्वास्थ्य मन्त्रालयले जनाएको छ ।
दुई प्यालेस्टाइनीको शव जेनिन सरकारी अस्पतालमा लगिएको थियो । स्थानीय स्रोत र प्रत्यक्षदर्शीहरूकाअनुसार इजरायली सेनाले काबातियामा आक्रमण गरेको, पूर्वाधारमा बुलडोज गरेको र त्यहाँका बासिन्दाहरूको सम्पती नष्ट गरेको छ ।
प्यालेस्टिनी विद्रोही र इजरायली सेनाबीच गोली हानाहानको आवाज सुनिएको स्रोतले जनाएको छ । इजरायली सेनाले आफ्नो ड्रोनले काबातिया नजिकैको सशस्त्र सेललाई निशाना बनाएको बताएको छ ।
