काठमाडौँको दरबारमार्गस्थित तीनधारा पाठशालाबाट चैते दशैँका दिनदेखि सुरु हुने वर्षा र सहकालका देवता सेतो मच्छेन्द्रनाथको रथयात्राको तयारी भैरहेको छ। गुठी संस्थानले जानकारी दिएको अनुसार, रथ निर्माण चैत्र शुक्ल प्रतिपदादेखि सुरु गरिएको थियो र चैत्र शुक्ल सप्तमी (चैत्र ११ गते) भित्र रथ बनाइसकिनेछ। प्रत्येक वर्ष जस्तै यस वर्ष पनि तीनधारा पाठशालाअघि ३२ हात लामो रथ तयार पारिएको छ, जुन नागराजको प्रतीक मानिन्छ। रथ निर्माणका लागि काठ लगायतका सामग्रीको व्यवस्था संस्थानले गर्ने चलन छ।
रथयात्रा चैत्र १२ गते दिउँसो ४ बजे तीनधारा पाठशालाबाट सुरु हुनेछ। पहिलो दिन रथ असन पुर्याइनेछ र असन पुगेपछि पूजा तथा आराधना गरिनेछ। परम्परा अनुसार कुमारीलाई पनि तीनधारा पाठशाला परिसरमा ल्याएर रथयात्रा सुरु गरिन्छ। त्यही दिन राति करिब १० बजे राष्ट्रपति रामचन्द्र पौडेलले रथको दर्शन गरी प्रसाद ग्रहण गर्ने कार्यक्रम पनि छ।
दोस्रो दिन, चैत १३ गते रथ असनबाट निकालेर वसन्तपुरस्थित कालभैरवतर्फ लगिनेछ भने तेस्रो दिन, चैत १४ गते वसन्तपुरबाट लगन हुँदै जात्रा सम्पन्न गरिन्छ। लगनमा सेतो मच्छेन्द्रनाथको आमाको मन्दिरमा रथ तीनपटक घुमाउने परम्परा छ। राजधानीमा सेतो मच्छेन्द्रनाथको रथयात्रा सकेपछि रातो मच्छेन्द्रनाथको रथयात्रा सुरु हुन्छ।
यस जात्राले वर्षा र सह हुने धार्मिक विश्वास जगाउँछ र राजधानीभर तीन दिनसम्म चल्ने यस रथयात्राले सांस्कृतिक र धार्मिक महत्त्व बोकेको छ।
