काभ्रे जिल्लाको पाँचखाल क्षेत्रमा यतिबेला किसानहरू आलु खन्न व्यस्त छन्। व्यापारी र उपभोक्तासमेत आलु किन्न सिधै खेतबारीमै पुगिरहेका छन्। खेतमै पुगेर किन्दा आलुको मूल्य प्रतिकिलो १२ देखि १५ रुपैयाँसम्म मात्र रहेको छ।
तर, मूल्य अत्यन्तै घटेपछि किसानहरू चिन्तित बनेका छन्। आलुले उचित भाउ नपाउँदा उत्पादन लागतसमेत उठाउन कठिन भइरहेको उनीहरूको गुनासो छ। किन आलुको मूल्य यति धेरै घट्यो भन्ने विषयमा किसानहरू स्वयं पनि स्पष्ट छैनन्। उनीहरूका अनुसार लामो समयपछि आलुको भाउ यसरी घटेको हो।
गत वर्ष यही समयमा आलु प्रतिकिलो २५ रुपैयाँसम्म बिक्री भएको थियो भने यस वर्ष मूल्य घटेर १२ रुपैयाँसम्म पुगेको छ। यस अवस्थाले किसानहरू मारमा परेका छन्।
किसानहरूले सरकारसँग आलुको न्यूनतम समर्थन मूल्य तोक्न वा सरकारले नै आलु खरिद गर्ने व्यवस्था मिलाउन माग गरेका छन्। उनीहरूको भनाइ छ, “हामीले उचित मूल्य पाएका छैनौँ, तर उपभोक्ताले भने महँगोमै किन्नुपरेको छ। यस विषयमा नयाँ बन्न लागेको सरकारले ध्यान दिनुपर्छ।”
