पाँचथरको फिदिम–२, फाल्गुनन्द, कुम्मायक, हिलिहाङ र मिक्लाजुङ क्षेत्रमा यस वर्ष चैते धान रोपाइँ विगत वर्षको तुलनामा छिटो सुरु भएको छ। यहाँका किसानहरूका अनुसार माघमा राखिएको बिउ गर्मीको कारण छिटो हुर्केपछि रोपाइँ पनि पहिले भन्दा केही हप्तासम्म अघि सरेको हो।
किसान उपेन्द्र अर्यालका अनुसार विगतमा १५ चैतपछि रोपाइँ सुरु हुन्थ्यो, तर यस वर्ष धेरैजसो खेतमा रोपाइँ सकिएको छ। किसान चन्द्रकुमारी श्रेष्ठले पनि गर्मी बढेको अनुभव भएको र जमिन तातिँदा बिउ छिटो हुर्किएको बताइन्।
अघिल्लो केही दिनको वर्षाले खेतमा पानी पुगेकोले रोपाइँ सजिलो भएको छ। कृषि ज्ञान केन्द्र पाँचथरका बाली संरक्षण अधिकृत केशर बहादुर मगरातीका अनुसार यस वर्ष चैतको पहिलो हप्तादेखि नै रोपाइँ सुरु भएको हो।
गत वर्ष पाँचथरमा २,१३६ हेक्टर क्षेत्रमा चैते धान खेती भएको थियो। सिचाइँको सुविधा नभएको कारण खेती कम भएको थियो भने यस वर्ष कुलो बनेकाले खेती बढ्ने अनुमान गरिएको छ।
