काठमाडौं । हालको मौसमी अवस्थामा तत्काल सुधार नआउने मौसमविदहरूले बताएका छन् । जल तथा मौसम विज्ञान विभागका अनुसार यो साताभर देशका विभिन्न भागमा वर्षा हुने सम्भावना रहेको छ भने गण्डकी प्रदेश सबैभन्दा बढी प्रभावित हुने देखिएको छ । गण्डकीका तराई, पहाड र हिमाली भेगमा साताभर नै वर्षा तथा हिमपात हुने सम्भावना छ, जहाँ केही स्थानमा भारी वर्षा वा हिमपातसमेत हुन सक्ने जनाइएको छ । कोशी, बागमती र गण्डकी प्रदेशका तराई क्षेत्र तथा मधेश प्रदेशका धेरै स्थानमा मंगलबारसम्म मध्यम वर्षा हुने र केही ठाउँमा भारी वर्षा हुन सक्ने अनुमान छ भने लुम्बिनी र सुदूरपश्चिम प्रदेशमा थोरै स्थानमा मात्रै मध्यम वर्षा हुने सम्भावना रहेको छ । पहाडी तथा हिमाली क्षेत्रमा पनि साताभर वर्षा र हिमपातको सम्भावना रहेको मौसमविदहरूले बताएका छन् । हाल मधेश र सुदूरपश्चिम बाहेकका अधिकांश प्रदेशमा वर्षा भइरहेको छ भने लुम्बिनी र गण्डकीका केही स्थानमा मध्यमदेखि भारी वर्षा भइरहेको छ । मौसमविदहरूले चट्याङसहित वर्षा हुने सम्भावना औंल्याउँदै आवश्यक सतर्कता अपनाउन र अद्यावधिक मौसम जानकारी लिएर मात्रै दैनिक कामको योजना बनाउन सुझाव दिएका छन् । साथै, पछिल्लो २४ घण्टामा गुल्मीको मुसिकोटमा सबैभन्दा धेरै ८६.६ मिलिमिटर वर्षा मापन भएको छ भने अन्य विभिन्न स्थानमा पनि भारी वर्षा भएको जनाइएको छ ।
