बर्दियाको ठाकुरबाबा नगरपालिका–३ मा एक दम्पतीले ‘प्रगन्ना तथा बड्कापथ सिँचाइ विभाग’ नामको नक्कली सरकारी कार्यालय सञ्चालन गरेर स्थानीयलाई ठगी गरेको पाइएको छ। पक्राउ पर्नेमा २४ वर्षीय घनश्याम न्यौपाने र उनकी श्रीमती कृपा चौधरी रहेका छन्। उनीहरूले सरकारी कार्यालय जस्तो देखिने साइनबोर्ड, लेटरप्याड र छाप बनाएर जागिर वा रोजगारी दिने आश्वासन दिएका थिए।
वास्तवमा, यस नामसँग मिल्दोजुल्दो ‘प्रगन्ना तथा बड्कापथ सिँचाइ व्यवस्थापन कार्यालय’ दाङको लमहीमा अवस्थित छ। अनुसन्धानका क्रममा स्थानीय व्यक्तिहरूलाई कर्मचारीका रूपमा नियुक्त गरिए पनि उनीहरूलाई ज्याला नदिएको र विभिन्न काममा लगाएको पाइएको छ। साथै, कार्यालय सञ्चालन भएको घरका धनीलाई घरको तल्ला थप्न लगाएर भुक्तानी नगरीकन प्रयोग गरिएको पनि खुलेको छ।
घटनाबारे घरधनीले जाहेरी दर्ता गरेपछि प्रहरीले जेठ २० गते दम्पतीलाई पक्राउ गरेको जिल्ला प्रहरी कार्यालय बर्दिया ले जनाएको छ। अनुसन्धान अझै जारी रहेको छ।
