काठमाडौं । देशभर मनसुनी प्रणाली सक्रिय भएसँगै बाढी, पहिरो र डुबानको जोखिम बढेपछि सरकारले सुरक्षा निकाय र सरकारी संयन्त्रलाई उच्च सतर्कतामा राखेको छ। बुधबार र बिहीबार मौसम थप प्रतिकूल रहने पूर्वानुमानबीच बंगालको खाडीबाट आएको जलवाष्पयुक्त हावाका कारण मनसुन थप सशक्त बनेपछि जोखिमयुक्त क्षेत्रमा उद्धार तथा राहतका लागि सुरक्षाकर्मी परिचालन गरिएको छ। सशस्त्र प्रहरी बल (एपीएफ) ले देशभर ५४ स्थानमा अस्थायी मनसुन प्रतिकार्य बेस स्थापना गरेको छ भने १६ अति जोखिमयुक्त क्षेत्रमा जनशक्ति र स्रोतसाधनसहितका स्थायी बेस तयारी अवस्थामा राखिएको छ। साथै, ‘एपीएफ कम्युनिटी अलर्ट सिस्टम’ मोबाइल एप र १११४ हटलाइन सेवा सञ्चालनमा ल्याएर विपद्को सूचना प्राप्त हुनासाथ नजिकको बाहिनीबाट उद्धार टोली परिचालन गर्ने व्यवस्था गरिएको एपीएफका प्रवक्ता नेत्रबहादुर कार्कीले जानकारी दिए। प्रतिनिधिसभाको पूर्वाधार विकास समितिका सभापति आशिष गजुरेलले विपद् व्यवस्थापनका लागि जनशक्ति र प्रविधिको अवस्था सुधारिए पनि नेपालको भौगोलिक अवस्थाका कारण चुनौती कायमै रहेको उल्लेख गर्दै स्थानीय तहलाई थप स्रोतसाधन उपलब्ध गराउन, राजमार्गका ‘ब्ल्याक स्पट’ सुधार गर्न र पूर्वसूचना प्रणालीको प्रभावकारी कार्यान्वयनमा जोड दिनुपर्ने बताए। यता, नेपाली सेनाले पनि बाढी–पहिरोबाट हुने क्षति न्यूनीकरणका लागि योजना अद्यावधिक, स्रोत–साधनसहितको पूर्वतैनाथी तथा प्रतिकार्यलाई समेटिएको तीन चरणको विशेष कार्ययोजना लागू गरेको छ। सेनाले इटहरी, सुर्खेत र काठमाडौंमा हेलिकप्टर, धादिङ, चितवन र बारामा बेली ब्रिज तथा आपत्कालीन मेडिकल किटसहितका फिल्ड अस्पताल तयारी अवस्थामा राखेको जनाएको छ। साथै, विपद्का घटनाबारे तत्काल स्थानीय विपद् व्यवस्थापन समिति वा सेनाको जनसम्पर्क निर्देशनालयमा जानकारी गराउन र सरकारले जारी गर्ने मौसम पूर्वानुमान नियमित रूपमा पालना गर्दै उच्च सतर्कता अपनाउन सर्वसाधारणलाई आग्रह गरेको छ।
