रुपन्देही । रुपन्देहीको रोहिणी गाउँपालिकाका स्थानीय बासिन्दाले नापी भएको करिब ५८ वर्षपछि जग्गाधनी दर्ता प्रमाणपुर्जा (लालपुर्जा) प्राप्त गरेका छन्। साविक बोधवार र पर्सा गाउँ विकास समिति क्षेत्रमा २०२५ सालमा गाउँब्लकका रूपमा छुट्याइएको कुल ३२४ वटा दर्तामध्ये २७१ वटा लालपुर्जा शुक्रबार सम्बन्धित जग्गाधनीलाई वितरण गरिएको हो।
दशकौँदेखि आफ्नो जग्गाको कानुनी स्वामित्वको प्रमाणपत्रको प्रतीक्षामा रहेका स्थानीयका लागि यो वितरण ऐतिहासिक उपलब्धिका रूपमा हेरिएको छ। लालपुर्जा प्राप्त भएसँगै जग्गाको स्वामित्व कानुनी रूपमा सुनिश्चित हुनुका साथै किनबेच, बैंकिङ कारोबार तथा विभिन्न प्रशासनिक सेवा लिन सहज हुने अपेक्षा गरिएको छ।
५८ वर्ष लामो प्रतीक्षापछि आफ्नै नाममा लालपुर्जा प्राप्त गर्न पाएकोमा स्थानीय बासिन्दाले खुसी व्यक्त गरेका छन्।
