काठमाडौं । कमन जेनजी नेपालले देशमा आएको भीषण बाढीका कारण पूर्वघोषित आन्दोलनका सम्पूर्ण कार्यक्रम स्थगित गरेको छ। राष्ट्र प्राकृतिक विपत्तिको चपेटामा परेर शोकमा डुबेको भन्दै संगठनले तत्कालका लागि आन्दोलनभन्दा उद्धार, राहत र पुनःस्थापनालाई प्राथमिकता दिने निर्णय गरेको हो।कमन जेनजी नेपालका अध्यक्ष विकेश साहले विज्ञप्ति जारी गर्दै संगठनको सम्पूर्ण पंक्ति बाढी प्रभावित क्षेत्रमा उद्धार, राहत तथा पुनःस्थापनाको कार्यमा खटिने जानकारी दिएका छन्। उनका अनुसार कमन जेनजी नेपालको टोली बाढीबाट अतिप्रभावित नुवाकोटका विभिन्न क्षेत्रमा स्थलगत अवलोकनसँगै उद्धार तथा राहत कार्यमा सक्रिय रहेको छ।
संगठनले बाढी प्रभावित नागरिकको उद्धार, राहत र पुनःस्थापनाका लागि सरकारसँगै सिंगो देश र विश्वभर रहेका नेपाली एकजुट हुनुपर्ने जनाएको छ। साथै, सरकारले उद्धार तथा राहत कार्यलाई थप प्रभावकारी बनाउनुपर्ने र विभिन्न जलविद्युत् आयोजनाका सुरुङमा फसेका नागरिकको तत्काल उद्धारका लागि सम्पूर्ण शक्ति परिचालन गर्नुपर्ने माग गरेको छ।कमन जेनजी नेपालले जेनजी आन्दोलन भएको एक वर्ष पूरा भएको अवसरमा आगामी भदौ २३ गतेदेखि देशव्यापी प्रदर्शन गर्ने तयारी गरेको थियो। जेनजीले उठाएका मागमध्ये सरकारले कति पूरा गर्यो भन्ने विषयमा खबरदारी गर्ने उद्देश्यले तय गरिएको आन्दोलन प्राकृतिक विपत्तिका कारण स्थगित गरिएको हो।
भदौ १० गते रसुवाको गोसाइँकुण्ड गाउँपालिका क्षेत्रमा आएको भीषण बाढीले ठूलो जनधनको क्षति पुर्याएको छ। बाढीसँगै आएको गेग्रानका कारण भोटेकोशी नदीको बहाव एकाएक बढ्दा नदी आसपासका बस्ती, सडक, पुल तथा जलविद्युत् आयोजनामा ठूलो क्षति पुगेको छ। बाढीका कारण स्थानीय बस्ती तथा पूर्वाधारसँगै कैलाश हिमाल र मानसरोवर यात्रामा रहेका पर्यटकसमेत प्रभावित भएका छन्।राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार सोमबार बिहान ९ बजेसम्म भोटेकोशीमा आएको बाढीमा परी ९०३ जनाको शव फेला परेको छ भने ४ हजार २२७ जना अझै सम्पर्कविहीन छन्। हालसम्म १० हजार ४५१ जनाको उद्धार गरिएको छ भने २६७ जना घाइते भएका छन्। घाइतेमध्ये १५६ जना उपचारपछि डिस्चार्ज भइसकेका छन्। पहिचान खुल्न नसकेका शवहरू विभिन्न जिल्लाका २१ अस्पतालमा राखिएको प्राधिकरणले जनाएको छ।बाढी प्रभावित क्षेत्रमा उद्धार, राहत तथा पुनःस्थापनाका लागि नेपाली सेना, नेपाल प्रहरी र सशस्त्र प्रहरीसहित २० हजार ८१९ सुरक्षाकर्मी परिचालन गरिएको छ। प्राधिकरणका अनुसार नेपाली सेनाका ८ हजार ७२२, नेपाल प्रहरीका ७ हजार ८९४ र सशस्त्र प्रहरीका ४ हजार २०३ जना सुरक्षाकर्मी उद्धार तथा राहत कार्यमा खटिएका छन्।
