काठमाडौं । परराष्ट्रमन्त्री शिशिर खनालले प्रधानमन्त्री वालेन्द्र शाह (बालेन) ले संयुक्त राष्ट्रसंघको ८१औँ महासभामा गरेको सम्बोधनलाई विश्व समुदायले उच्च महत्व र चासोका साथ लिएको बताएका छन्। महासभामा सहभागी भएर स्वदेश फर्किएपछि त्रिभुवन अन्तर्राष्ट्रिय विमानस्थलमा पत्रकारहरूसँग कुरा गर्दै मन्त्री खनालले नेपालको पछिल्लो राजनीतिक परिवर्तनपछि बनेका युवा प्रधानमन्त्रीले विश्व मञ्चमा देशलाई कसरी प्रस्तुत गर्छन् भन्ने विषयमा अन्तर्राष्ट्रिय स्तरमै ठूलो प्रतीक्षा रहेको आफूले पाएको बताए।खनालका अनुसार प्रधानमन्त्री शाहको सम्बोधनपछि विभिन्न अन्तर्राष्ट्रिय सञ्चारमाध्यममा त्यसले उल्लेख्य स्थान पाएको थियो। उनले सम्बोधनको भिडियोले समेत व्यापक दर्शकको ध्यान खिचेको दाबी गरे। न्यूयोर्कमा भएका विभिन्न औपचारिक तथा अनौपचारिक भेटवार्ताका क्रममा विदेशी प्रतिनिधि तथा कूटनीतिज्ञहरूले प्रधानमन्त्री शाहको सम्बोधनको खुलेर प्रशंसा गरेको पनि उनले बताए।
विश्व समुदायले प्रधानमन्त्री शाहले विश्व मञ्चमा उठाएका विषय र मुद्दाप्रति बलियो ऐक्यबद्धता जनाएको मन्त्री खनालको भनाइ छ। उनले नेपालको पछिल्लो राजनीतिक परिवर्तन, सरकारका प्राथमिकता तथा अन्तर्राष्ट्रिय समुदायसँगको सहकार्यका विषयमा प्रधानमन्त्रीको सम्बोधनले नेपालको धारणा विश्वसामु प्रस्तुत गरेको बताए।यसैबीच, परराष्ट्रमन्त्री खनालले भोटेकोशी बाढीपछि आवश्यक पुनर्निर्माण तथा जलवायु संकटविरुद्ध जुध्न नेपाललाई सहयोग गर्न अन्तर्राष्ट्रिय समुदायले गहिरो चासो देखाएको जानकारी दिए। उनका अनुसार विपद्पछिको पुनर्निर्माण र जलवायुजन्य जोखिम न्यूनीकरणका लागि अन्तर्राष्ट्रिय सहकार्य र सहयोग जुटाउने विषयमा पनि महासभाका क्रममा महत्वपूर्ण छलफल भएको छ।
