काठमाडौं, – चर्चित नृत्यांगना र अभिनेत्री नोरा फतेही नेपालमा पहिलोपटक प्रस्तुति दिन आउनेछिन्। ३ जेठमा बौद्धस्थित हायातको चौरमा हुने यस कार्यक्रमको मुख्य उद्देश्य ‘हुमन रेस्पेक्ट नेपाल’ नामक च्यारिटी संस्थाको सहयोग जुटाउनु हो।
वर्ल्डवाइर्ड फिल्मस् नेटवर्क प्रालि र इभेन्ट व्यवस्थापन मनु मिडिया प्रालिले आयोजना गर्दैछ। कार्यक्रममा नोरा फतेहीको साथमा २० भन्दा बढी कोरस डान्सरहरूले नृत्य प्रस्तुत गर्नेछन्। यसका अलावा, नेपालका चर्चित कलाकारहरूले पनि आफ्ना प्रस्तुति दिनेछन्।
कार्यक्रमको लागि टिकट मूल्य २ हजार, ४ हजार, ७ हजार र १६ हजार राखिएको छ, जसको खरीद खल्ती एपबाट गर्न सकिन्छ। नोरा फतेहीले ‘दिलबर दिलबर’, ‘कुसु कुसु’ र ‘ओ साकी साकी’ जस्ता गीतमा चर्चित नृत्य प्रस्तुत गरेकी छन्। उनको पछिल्लो गीत ‘स्नेक’ विश्वभर चर्चित छ।
यस अवसरमा, नेपाली र सीमावर्ती भारतीय दर्शकहरूको ठूलो सहभागिता अपेक्षित गरिएको छ।
