काठमाडौँ र धादिङ जोड्ने नेपालकै पहिलो आधुनिक सुरुङमार्ग नागढुङ्गा–सिस्नेखोला सुरुङमार्ग सञ्चालनको अन्तिम तयारीमा पुगेको छ। देशको यातायात पूर्वाधारमा ऐतिहासिक परिवर्तन ल्याउने अपेक्षा गरिएको यो परियोजना बहुआयामिक रूपमा महत्वपूर्ण मानिन्छ। यस सुरुङमार्गको शिलान्यास २०७६ कात्तिकमा तत्कालीन प्रधानमन्त्री केपी शर्मा ओलीले गरेका थिए। सुरुमा करिब २२ अर्ब रुपैयाँ लागत अनुमान गरिएको भए पनि निर्माणका क्रममा भूगर्भीय समस्या, डिजाइन परिवर्तन तथा अन्य प्राविधिक कारणले लागत बढ्दै २७ अर्ब रुपैयाँभन्दा बढी पुगेको छ। जापान सरकारको सहुलियतपूर्ण ऋण सहयोगमा जापानी कम्पनी हाजमा–आन्दो जेभीले निर्माण जिम्मा पाएको यो परियोजना प्रारम्भमा ४२ महिनाभित्र सम्पन्न गर्ने लक्ष्य राखिएको भए पनि विभिन्न ढिलाइका कारण २०८२ सालसम्म निर्माण सम्पन्न भएको हो। हाल धादिङतर्फ पहिरो नियन्त्रण र टोल गेट निर्माणका काम बाँकी छन्। सुरुङमार्ग सञ्चालन तथा व्यवस्थापनका लागि चिनियाँ कम्पनी युक्सिन–एआरटीले पाँच वर्षको ठेक्का पाइसकेको छ, जसअनुसार करसहित करिब एक अर्ब १० करोड रुपैयाँभन्दा बढीमा सम्झौता भएको छ। साथै, सरकारले सुरुङमार्ग प्रयोग गर्ने सवारीसाधनबाट शुल्क लिने दरसमेत राजपत्रमार्फत सार्वजनिक गरिसकेको छ। यस सुरुङमार्ग सञ्चालनमा आएपछि काठमाडौँ–धादिङ आवागमन सहज हुने, यात्रा समय घट्ने र सडक सुरक्षा उल्लेख्य रूपमा सुधार हुने अपेक्षा गरिएको छ।
