भारतीय संगीतकी दिग्गज गायिका Asha Bhosle (आशा भोसले) लाई अत्यधिक कमजोरी र छातीमा संक्रमण देखिएपछि मुम्बईस्थित ब्रीच क्यान्डी अस्पतालमा भर्ना गरिएको छ। शनिबार उनलाई आपत्कालीन कक्षमा राखी उपचार सुरु गरिएको हो। हाल उनको स्वास्थ्य अवस्थाबारे विस्तृत आधिकारिक जानकारी सार्वजनिक नभए पनि उपचार जारी रहेको बताइएको छ।
उनकी नातिनी जनाई भोसलेले सामाजिक सञ्जालमार्फत जानकारी दिँदै आशा भोसलेको अवस्था स्थिर राख्ने प्रयास भइरहेको र गलत समाचार नफैलाउन अनुरोध गरेकी छन्। उनले परिवारको गोपनीयताको सम्मान गर्न पनि आग्रह गरेकी छन्। यसैबीच, भारतका प्रधानमन्त्री नरेन्द्र मोदीले पनि सामाजिक सञ्जालमार्फत उनको शीघ्र स्वास्थ्य लाभको कामना गरेका छन्।
७ दशकभन्दा बढी समयदेखि भारतीय संगीतमा सक्रिय आशा भोसलेले हजारौँ गीत विभिन्न भाषामा गाएकी छन् र आफ्नो बहुमुखी गायनका लागि विश्वभर परिचित छन्।
