काठमाडौंको थापाथली स्थित बागमती नदी किनारमा बसोबास गर्दै आएका सुकुमवासीहरूले आफू बसेका घर खाली गर्न थालेका छन्। सरकारले बस्तीका संरचना भत्काउने तयारी गरेपछि उनीहरूले आज बिहानदेखि सामान सार्न सुरु गरेका हुन्।
प्रहरीले बिहीबार बेलुकी बस्ती खाली गर्न माइकिङ गरेको थियो। यसअघि बुधबार गृहमन्त्री पदबाट सुदन गुरुङ ले राजीनामा दिएपछि बालेन शाह ले सुरक्षा निकायका प्रमुखहरूलाई बोलाएर सुकुमवासी बस्ती खाली गराउन निर्देशन दिएका थिए।
प्रधानमन्त्रीको निर्देशनअनुसार बिहीबार काठमाडौंका प्रमुख जिल्ला अधिकारी ईश्वरराज पौडेलले जिल्ला सुरक्षा समितिको बैठकमार्फत बस्ती खाली गराउने निर्णय गरेका थिए। उक्त बैठकमा सुनिता डंगोल लगायत सुरक्षा निकायका अधिकारीहरूको उपस्थिति थियो।
जिल्ला सुरक्षा समितिको निर्णयअनुसार प्रहरीले बिहीबार साँझ थापाथलीसहित काठमाडौंका चार वटा सुकुमवासी बस्तीमा माइकिङ गरेको थियो। प्रशासनले पहिलो चरणमा थापाथलीसहित चार स्थानमा डोजर चलाउने जनाएको छ।
सरकारले डोजर चलाउने सूचना दिएपछि केही स्थानीयले आफ्नै पहलमा सामान बोकेर वा सवारीसाधनमार्फत अन्यत्र सारिरहेका छन्। तर केही बासिन्दाले भने सरकारको निर्णयको विरोध गर्दै बस्ती खाली नगर्न आग्रह गरिरहेका छन्।
