पाँचथरको यासोक बजारमा हरेक तीन वर्षमा आयोजना हुने ऐतिहासिक कुम्मायक–कुसायक पूजा तथा मेलाले यतिबेला विशेष रौनक थपेको छ । बुधबार बिहान वर्षात्को बीच परम्परागत पोसाकमा सजिएका भक्तजन च्याब्रुङ, नौमतीबाजा र साकेलासहित पूजा सामग्री बोकेर कुम्मायकतर्फ उक्लिएका थिए । तङ्सुम तङ्नाम त्रिशाली पूजा तथा मेलाका कारण यासोक बजार झकिझकाउ र भरिभराउ बनेको छ । कुम्मायकमा नैवेद्य पूजा र कुसायकमा बलि दिने परम्परा रहेको छ भने दर्शन तथा भाकल पूरा गर्न नेपालका विभिन्न स्थानसहित विदेशबाट समेत भक्तजन आउने गरेका छन् । धनकुटाबाट आएकी पार्वती इवाले कामना पूरा भएको अनुभूति गर्दै तेस्रो पटक पूजा गर्न आएको बताइन् । आयोजकका अनुसार राजा उहाङको पालादेखि सुरु भएको मानिने यो पूजा छैटौँ/सातौँ शताब्दीदेखि निरन्तर चल्दै आएको विश्वास छ । मेलामा धाननाच, स्थानीय उत्पादनको प्रदर्शनी तथा बिक्री, त्रिशाली गोल्डकप फुटबल, ब्याडमिन्टन, चेस प्रतियोगिता तथा चर्चित कलाकारहरूको सांगीतिक प्रस्तुति भइरहेको छ । शनिबारसम्म सञ्चालन हुने मेलामा गाउँपालिकाको सक्रिय सहयोग रहेको कुम्मायक गाउँपालिकाका अध्यक्ष बम लावतीले बताएका छन् ।
