काठमाडौं । राष्ट्रिय स्वतन्त्र पार्टी (रास्वपा) का सांसद पारसमणि गेलालले मन्त्रीहरूलाई मन्त्रालयको काम छाडेर अनावश्यक रूपमा जिल्ला भ्रमणमा ननिस्कन आग्रह गरेका छन्। सोमबार प्रतिनिधिसभाको शून्य समयमा बोल्दै उनले मन्त्रीहरूले देश घुम्नेभन्दा जनताका समस्या समाधान गर्ने हुटहुटी देखाउनुपर्ने बताए। उनले मन्त्रीहरूलाई मन्त्रालयमै बसेर नीति निर्माण, निर्णय र कर्मचारीको मनोबल उच्च बनाउन सुझाव दिँदै १६५ वटै निर्वाचन क्षेत्रका समस्या सम्बन्धित सांसदहरूले सरकारसमक्ष राख्न सक्ने बताए। जम्बो सल्लाहकार नियुक्त गरेर राज्यको ढुकुटी खर्च गर्न आवश्यक नरहेको उनको भनाइ थियो।
गेलालले अहिले जनता ग्यास, मल, सञ्चार सेवा, विद्युत् तथा आधारभूत स्वास्थ्य सेवाका लागि समस्यामा रहेको उल्लेख गर्दै सरकारको प्राथमिकता त्यसतर्फ हुनुपर्ने बताए। मन्त्रीलाई सामान्य स्वास्थ्य समस्या हुँदा हेलिकप्टर उपलब्ध हुने तर सर्वसाधारण गम्भीर अवस्थामा पुग्दा अस्पतालसम्म जाने साधन नपाउने र अस्पतालमा चिकित्सकसमेत नहुने अवस्थाप्रति उनले प्रश्न उठाए। बैतडी पुगेका पूर्वाधारमन्त्री सुनील लम्साल स्वास्थ्यमा समस्या भएपछि हेलिकप्टरमार्फत धनगढी र त्यसपछि सेनाको स्काइ ट्रकमार्फत काठमाडौं ल्याइएको घटनालाई उनले यसै सन्दर्भमा उल्लेख गरेका हुन्। लम्साल हाल उपचारपछि डिस्चार्ज भइसकेका छन्।
मन्त्रीहरू जिल्ला पुगेर भिडियो बनाएर प्रचार गर्दैमा जनता खुसी नहुने भन्दै गेलालले सरकारका कारण समस्या समाधान भएको अनुभूति जनताले गर्नुपर्ने बताए। पछिल्लो समय मन्त्रीहरू विभिन्न जिल्लाको भ्रमणमा रहेका बेला उनले यस्तो टिप्पणी गरेका हुन्। जिल्ला भ्रमणका क्रममा आगामी स्थानीय तहको निर्वाचनलाई लक्षित अभिव्यक्ति दिँदै रास्वपाका उम्मेदवारलाई मत दिन आग्रह गर्ने गतिविधिप्रति पनि उनको भनाइ जोडिएको देखिन्छ। उनले अन्ततः मन्त्रीहरूलाई स्पष्ट सन्देश दिँदै भने, “देश नघुम्नुस्, देशको समस्या समाधान गर्नुस्।”
