काठमाडौँ । सांसदहरूले मुलुकको कूटनीतिक अवस्था, जनस्वास्थ्यमा देखिएका गम्भीर समस्या, भौतिक पूर्वाधार निर्माणमा भइरहेको ढिलासुस्ती तथा बाढी–पहिरोको जोखिम न्यूनीकरणका विषयमा सरकारको गम्भीर ध्यानाकर्षण गराएका छन्।
राष्ट्रिय सभाको मंगलबारको बैठकमा शून्य समयमा बोल्दै सांसदहरूले पछिल्लो समय मुलुकमा देखिएका विभिन्न सार्वजनिक सरोकारका विषयलाई प्राथमिकताका साथ सम्बोधन गर्न सरकारसँग आग्रह गरेका हुन्। उनीहरूले नागरिकको स्वास्थ्य सुरक्षादेखि सडक तथा पूर्वाधार निर्माणको अवस्था र प्राकृतिक विपद्बाट हुन सक्ने क्षति न्यूनीकरणका लागि प्रभावकारी कदम चाल्नुपर्नेमा जोड दिए।
सांसदहरूले कूटनीतिक क्षेत्रमा नेपालको राष्ट्रिय हितलाई केन्द्रमा राखेर सरकार अघि बढ्नुपर्ने बताउँदै जनस्वास्थ्यका समस्या समाधान गर्न आवश्यक स्रोत, जनशक्ति र पूर्वतयारीमा ध्यान दिन आग्रह गरे। त्यस्तै, निर्माणाधीन भौतिक पूर्वाधार आयोजनामा भइरहेको ढिलाइ अन्त्य गरी समयमै काम सम्पन्न गर्न तथा वर्षायाममा बाढी–पहिरोको जोखिममा रहेका क्षेत्रमा पूर्वतयारी र उद्धार व्यवस्थालाई प्रभावकारी बनाउन सरकारको ध्यानाकर्षण गराए।
