बाजुरा । बाढी तथा पहिरोबाट प्रभावित बाजुराका १५८ परिवारलाई राहत सामग्री वितरण गरिएको छ । अविरल वर्षाका कारण घर, खेतबारी तथा दैनिक जनजीवन प्रभावित बनेका परिवारलाई खाद्यान्न, गैरखाद्य तथा सरसफाइ सामग्री उपलब्ध गराइएको हो । ‘पश्चिम नेपालमा बाढी तथा पहिरो आपत्कालीन प्रतिकार्य परियोजना–२०२६’ अन्तर्गत बडीमालिका फाउन्डेसन नेपालको समन्वयमा राहत वितरण गरिएको हो ।राहत सामग्रीमा चामल, दाल, नुन, खानेतेल, म्याट्रेस, ब्ल्याङ्केट, सोलार बत्ती, न्यानो कपडा, साबुन, बाल्टिनलगायतका सामग्री रहेका छन् । विशेषगरी वर्षायामपछि विस्थापित भएका तथा घरमा क्षति पुगेका परिवारलाई प्राथमिकताका आधारमा राहत सामग्री वितरण गरिएको जनाइएको छ ।
बडीमालिका नगरपालिकाका नगरप्रमुख अमरबहादुर खड्काले यस वर्षको वर्षायाममा जिल्लामा मानवीय क्षति न्यून भए पनि सडक, खानेपानी, सिँचाइ, घर तथा सार्वजनिक संरचनामा ठूलो भौतिक क्षति पुगेको बताए । गौमुल गाउँपालिकाका उपाध्यक्ष सीता थापाले बाढीपहिरोका कारण गाउँपालिकाका विभिन्न वडामा दर्जनौँ घर तथा सयौँ रोपनी खेतबारीमा क्षति पुगेको बताउँदै तत्काल राहत उपलब्ध गराउने संस्थाहरूको सहयोगले प्रभावित परिवारलाई ठूलो राहत महसुस भएको बताइन् ।नेपाल पत्रकार महासङ्घ बाजुराका अध्यक्ष तथा बडीमालिका फाउन्डेसन नेपालका उपाध्यक्ष पदमबहादुर सिंहले जिल्लामा विपद् पर्दा विभिन्न संस्थासँग समन्वय गरी प्रभावित समुदायसम्म सहयोग पुर्याउने प्रयास निरन्तर भइरहेको बताए । कारितास नेपालका प्रदेश कार्यक्रम अधिकृत ऋषि शर्माका अनुसार बडीमालिका नगरपालिकाका ६७, त्रिवेणी नगरपालिकाका ४५ र गौमुल गाउँपालिकाका ४६ गरी कुल १५८ प्रभावित परिवारलाई राहत सामग्री प्रदान गरिएको हो ।
स्थानीय तहसँगको समन्वयमा राहत वितरण अभियान असोज ९ गते त्रिवेणी नगरपालिका–९, ताम्सुबाट सुरु गरिएको थियो । त्यसपछि असोज ११ गते बडीमालिका नगरपालिका र असोज १२ गते गौमुल गाउँपालिकामा राहत वितरण कार्यक्रम सम्पन्न गरिएको हो । यस वर्षको मनसुनमा लगातारको वर्षापछि बाजुराका विभिन्न बस्तीमा पहिरो खस्दा घर जोखिममा परेका, खेतबारी बगेका तथा खाद्यान्न अभाव झेलिरहेका परिवारलाई लक्षित गरी राहत वितरण गरिएको जनाइएको छ ।गत साउन २८ गते राति अविरल वर्षासँगै आएको पहिरोले त्रिवेणी नगरपालिका–९, ताम्सुमा घर पुरिँदा एक जनाको मृत्यु र दुई जना घाइते भएका थिए । हाल पूरै गाउँ उच्च जोखिममा रहेको जनाइएको छ । त्यस्तै, गौमुल गाउँपालिका–३, काटीगाउँलगायत अन्य वडामा गत भदौ ४ गते अविरल वर्षापछि आएको पहिरोका कारण दर्जनौँ घरपरिवार विस्थापित भएका थिए । भदौ १९ र २० गते आएको बाढीपहिरोले बडीमालिका नगरपालिकाका विभिन्न स्थानमा घर तथा खेतबारीमा समेत क्षति पुर्याएको थियो ।
