काठमाडौं । नेकपा एमालेका केन्द्रीय सदस्य विजयकुमार सरावगीले पार्टी परित्याग गर्दै राष्ट्रिय स्वतन्त्र पार्टी (रास्वपा) मा प्रवेश गरेका छन्। सरावगीले बिहीबार राति रास्वपाको अनलाइन सदस्यता लिएको र शुक्रबारदेखि आफू एमालेमा नरहेको रातोपाटीलाई बताएका छन्। रास्वपाको एजेन्डाबाट प्रभावित भएर पार्टीमा आबद्ध भएको उल्लेख गर्दै उनले मेयर बन्ने उद्देश्यले पार्टी परिवर्तन गरेको भन्ने प्रचारमा सत्यता नरहेको स्पष्ट पारेका छन्। भविष्यमा पार्टीले कुनै जिम्मेवारी दिए स्वीकार गर्ने बताउँदै सरावगीले एमालेमा विचारी यादवबाहेक अन्य मुख्य नेताहरूबाट सहयोग नपाएको गुनासो गरे। उनले एमाले र नेपाली कांग्रेसको कार्यशैलीमा सुधार आउने संकेत नदेखिएको टिप्पणी गर्दै पार्टीको माथिल्लो तहमा समस्या रहेको र त्यसको समाधानतर्फ ध्यान नदिइएको बताए। व्यापारी पृष्ठभूमिबाट राजनीतिमा प्रवेश गरेका सरावगीले आफ्नो राजनीतिक निर्णय पार्टीको एजेन्डाका आधारमा लिएको बताएका छन्।
