काठमाडौँ – अमेरिकी पूर्वराष्ट्रपति डोनाल्ड ट्रम्पले नयाँ ‘गोल्ड कार्ड’ भिसा कार्यक्रमको प्रस्ताव गरेका छन्। यस कार्यक्रम अन्तर्गत ५० लाख अमेरिकी डलर (झण्डै ७० करोड नेपाली रुपैयाँ) तिरेर अमेरिकामा बसोबास, काम गर्न र नागरिकता प्राप्त गर्न सहज हुने बताइएको छ।
गोल्ड कार्डको विशेषता
यो नयाँ भिसा कार्यक्रम ग्रीन कार्डभन्दा विशेष हुने दावी गरिएको छ। अमेरिकाको मुख्य उद्देश्य विदेशी धनाढ्यहरूलाई आकर्षित गरी ठूलो मात्रामा लगानी भित्र्याउनु हो। यस कार्यक्रम मार्फत लाखौं कार्ड बिक्री हुने अनुमान गरिएको छ, र दुई हप्ताभित्र यसको बिक्री प्रक्रिया सुरु हुने बताइएको छ।
रूसी अर्बपतिहरूलाई पनि उपलब्ध
पत्रकारहरूको सोधपुछमा, ट्रम्पले रूसी अर्बपतिहरूलाई पनि यो गोल्ड कार्ड उपलब्ध गराउने बताएका छन्। यसले अमेरिकी अर्थतन्त्रमा विदेशी लगानीलाई प्रोत्साहन दिने उनको दाबी छ।
ईबी-५ भिसाको विकल्प?
अहिले अमेरिकामा ‘ईबी-५ भिसा’ कार्यक्रमअन्तर्गत विदेशी लगानीकर्तालाई नागरिकता प्रदान गरिन्छ। यस भिसा योजनामा १ मिलियन डलर लगानी गरी कम्तीमा १० अमेरिकी नागरिकलाई रोजगारी दिनुपर्ने प्रावधान रहेको छ। ट्रम्पको नयाँ ‘गोल्ड कार्ड’ भिसाले यो कार्यक्रमको स्थान लिने दाबी गरिएको छ।
ट्रम्पको दाबी
ट्रम्पका अनुसार, उनी कम्तीमा १० लाख ‘गोल्ड कार्ड’ बिक्री गर्ने लक्ष्य राखेका छन्। यसबाट अमेरिकाले आफ्नो राष्ट्रिय ऋण छिट्टै तिर्न सक्षम हुने उनकाे दाबी छ। यो नयाँ भिसा योजनाले अमेरिकी अर्थतन्त्रमा कस्तो प्रभाव पार्ने विषयमा विशेषज्ञहरू बीच बहस भइरहेको छ।
