कञ्चनपुरको भीमदत्त नगरपालिका–४ का ४२ वर्षीय भरत लोहारका लागि पछिल्ला तीन महिना जीवनकै सबैभन्दा कष्टकर बने। छारे रोगबाट ग्रसित उनी पुसको चिसो छल्न घरमै आगो तापिरहेका बेला अचानक अचेत भई आगोमा परे, जसले उनको हातखुट्टाका अधिकांश भाग गम्भीर रूपमा जले। गरिबीका कारण परिवारले आधुनिक अस्पतालमा उपचार गराउन नसक्दा घरेलु जडीबुटीको सहारामा बसेका उनीहरूको आशा उल्टै निराशामा परिणत भयो। घाउ झन् बिग्रँदै गएर किरा पर्नेसम्मको अवस्था पुगेपछि भरतले मृत्यु कुर्नुबाहेक अर्को विकल्प देखेनन्। चरम पीडा र निराशाबीच उनले बाँच्ने आशा समेत गुमाइसकेका थिए।
तर परिस्थितिले अप्रत्याशित मोड लियो, जब नबिल बैंकको पहलमा सुष्मा कोइराला मेमोरियल अस्पताल र सेती प्रादेशिक अस्पतालको सहकार्यमा धनगढीमा आयोजित निःशुल्क जलन उपचार शिविरमा उनी पुगे। प्रारम्भिक उपचारपछि काठमाडौं रिफर गरिएका भरत हाल सुष्मा कोइराला मेमोरियल अस्पतालमा निःशुल्क उपचार गराइरहेका छन्, जहाँ उनले तीन पटक शल्यक्रिया गराइसकेका छन् र अवस्था क्रमशः सुधारोन्मुख छ। यससँगै, उनीमा पुनः बाँच्ने र केही गर्ने आशा जागेको छ।
यो घटना नेपालमा जलन उपचारको तीतो यथार्थ उजागर गर्ने उदाहरण पनि हो, जहाँ जलनका घटना प्रायः गरिब वर्गमा हुने भए पनि यसको उपचार अत्यन्त महँगो हुने गर्दछ। सरकारी तथ्यांकअनुसार प्रत्येक वर्ष करिब ५६ हजार मानिस जलनको सिकार हुने भए पनि केवल २.५ प्रतिशत मात्र उपचारका लागि अस्पताल पुग्ने गरेका छन्। आर्थिक अभाव, स्वास्थ्य सेवामा पहुँचको कमी र जनचेतनाको अभावले अधिकांश पीडित उपचारबाट वञ्चित रहन्छन्।
यही अवस्थालाई मध्यनजर गर्दै नबिल बैंकले बर्न प्रोजेक्टमार्फत यस्ता निःशुल्क शिविर सञ्चालन गर्दै आएको छ। धनगढीमा सम्पन्न तीनदिने शिविरमा ६५ जना बिरामीले प्रारम्भिक उपचार पाएका थिए, जसमा २० जनाको शल्यक्रिया गरिएको र १८ जनालाई थप उपचारका लागि काठमाडौं ल्याइएको छ। यस अभियानले भरत लोहारजस्ता पीडितहरूलाई नयाँ जीवनको आशा दिनुका साथै स्वास्थ्य सेवामा पहुँच विस्तार गर्ने महत्वपूर्ण प्रयासको रूपमा देखिएको छ।
