पोखरामा चैत २५ गते साँझ बीच बजार क्षेत्रमा भएको एक दर्दनाक घटनाले शहरलाई स्तब्ध बनाएको छ। शिवालय चोकबाट सभागृह चोकतर्फ जाँदै गरेकी पोखरा–५ मालेपाटनकी सिर्जना पौडेल केसीमाथि धारिलो हतियार प्रहार गरी हत्या गरिएको हो।
साँझ करिब ७ बजे पसल बन्द गरेर घर फर्किँदै गर्दा उनीमाथि आक्रमण भएको थियो। गम्भीर रूपमा घाइते भएकी उनलाई तत्कालै अस्पताल लगिए पनि उनको ज्यान जोगाउन सकिएन।प्रहरी अनुसन्धान अनुसार यो घटना आकस्मिक नभई योजनाबद्ध रूपमा गरिएको देखिएको छ। प्रारम्भिक निष्कर्षमा मृतकका आफ्नै भाञ्जा घटनामा संलग्न रहेको पाइएपछि प्रहरीले उनलाई पक्राउ गरेको छ। घटनामा प्रयोग भएको मोटरसाइकलका चालकको भने अझै खोजी भइरहेको छ।
अनुसन्धानबाट पारिवारिक विवाद, सम्पत्ति (अंश) सम्बन्धी मुद्दा तथा पुरानो मनमुटाव यस घटनाको मुख्य कारण हुनसक्ने देखिएको छ। मृतक र परिवारबीच लामो समयदेखि सम्पत्ति विवाद चल्दै आएको र सो मुद्दा अदालतमा विचाराधीन रहेको जनाइएको छ।
प्रहरीका अनुसार आरोपितहरूले घटनाको दिन दिउँसैदेखि निगरानी गरेका थिए र साँझ कम भीड भएको समयमा आक्रमण गरिएको थियो। प्रारम्भिक बयानमा आरोपितले व्यक्तिगत रिस र अपमानका कारण घटना घटाएको बताएका छन्। तर घटनामा अन्य परिवार सदस्यको संलग्नता हुनसक्ने आशंकामा अनुसन्धान जारी छ।यस घटनाले पोखराको सुरक्षा व्यवस्थामाथि गम्भीर प्रश्न उठाएको छ। बीच बजारमै भएको आक्रमणपछि सुरक्षा व्यवस्था र निगरानी प्रणालीबारे आलोचना भइरहेको छ।
प्रहरीले घटनाबारे थप अनुसन्धान जारी राखेको छ भने विस्तृत विवरण सार्वजनिक गर्ने जनाएको छ।
