सिन्धुलीको फिक्कल गाउँपालिका–२ नवलपुरस्थित सुनकोशी नदीमा कार खसेको सूचना आएको छ। जिल्ला प्रहरी कार्यालय सिन्धुलीका प्रहरी उपरीक्षक (एसपी) रवीन्द्रबहादुर सिंहका अनुसार कार नदीमा खसेको जानकारी पाएपछि प्रहरी र सशस्त्र प्रहरीको टोली घटनास्थलतर्फ गएको छ। प्रारम्भिक सूचनाअनुसार बसको ठक्करबाट कार नदीमा खसेको बताइएको छ। कारमा कति जना सवार थिए भन्ने यकिन हुन सकेको छैन भने नदीमा खसेको कारको नम्बर र ठक्कर दिएको भनिएको बसको नम्बरसमेत खुल्न बाँकी रहेको प्रहरीले जनाएको छ। घटनास्थलमा पुगेपछि थप विवरण सार्वजनिक हुने बताइएको छ।
