काठमाडौं उपत्यकामा पटक–पटक ट्राफिक नियम उल्लङ्घन गर्ने ३१ जना चालकको सवारीचालक अनुमतिपत्र (लाइसेन्स) निलम्बनका लागि सिफारिस गरिएको छ। काठमाडौँ उपत्यका ट्राफिक प्रहरी कार्यालय ले १६ पटकसम्म ट्राफिक नियम उल्लङ्घन गरेको पाइएपछि ती चालकहरूको लाइसेन्स ६ महिनाका लागि निलम्बन गर्न यातायात व्यवस्था विभाग लाई पत्राचार गरेको हो।
प्रहरी प्रवक्ता नवराज अधिकारी का अनुसार पटक–पटक कारबाहीमा पर्दा पनि नियम उल्लङ्घन दोहोर्याउने चालकहरूलाई नियन्त्रण गर्न यस्तो कदम चालिएको हो। सवारी तथा यातायात व्यवस्था ऐन, २०४९ अनुसार पाँच पटकभन्दा बढी ट्राफिक नियम उल्लङ्घन गर्ने चालकको लाइसेन्स छ महिनासम्म निलम्बन गर्न सकिने कानुनी व्यवस्था छ।
ट्राफिक प्रहरीले केवल जरिवाना तिराउँदा मात्रै चालकहरूमा नियम पालना गर्ने प्रवृत्ति विकास नभएको निष्कर्ष निकाल्दै लाइसेन्स निलम्बन प्रक्रिया अघि बढाएको जनाएको छ। निलम्बनमा परेका चालकहरूले ६ महिनासम्म कुनै पनि सवारीसाधन चलाउन पाउने छैनन्। प्रहरीले यस कारबाहीले काठमाडौं उपत्यकामा सवारी दुर्घटना न्यूनीकरण तथा ट्राफिक नियमको प्रभावकारी पालना गराउन सहयोग पुग्ने विश्वास व्यक्त गरेको छ।
