काठमाडौँ — कञ्चनपुरको शुक्लाफाँटा नगरपालिका–४ मा जन्मिएकी ३३ वर्षीया गीता चौधरीले कृषि तथा पशुपन्छी विकास एवं वन तथा वातावरणमन्त्रीको जिम्मेवारी सम्हालेकी छन्। एक साधारण थारू परिवारबाट उठेर कानुनी संघर्षको मैदान हुँदै देशको कार्यकारी तहसम्म पुग्नु उनको जीवनयात्राको महत्वपूर्ण उपलब्धि हो, जसले अवसरसँगै चुनौतीहरू पनि बोकेको छ।
कानुनमा स्नातकोत्तर गरेकी चौधरी पेशाले अधिवक्ता हुन्। उनले विशेषगरी गरिब, दलित तथा सीमान्तकृत समुदायका लागि निःशुल्क कानुनी परामर्श प्रदान गर्दै आफ्नो पहिचान बनाएकी छन्। आर्थिक अभावबीच संघर्ष गरेर उच्च शिक्षा हासिल गरेकी उनले जग्गा विवाद र घरेलु हिंसाजस्ता मुद्दामा १५० भन्दा बढी नागरिकलाई न्यायसम्म पहुँच पुर्याउन सहयोग गरेकी छन्।
उनको राजनीतिक यात्रा २०६२/६३ को जनआन्दोलनपछि सुरु भएको हो। विभिन्न राजनीतिक दल हुँदै अन्ततः राष्ट्रिय स्वतन्त्र पार्टी (रास्वपा) मार्फत उनी मन्त्री बनेकी हुन्।
चौधरीले यस्तो समयमा मन्त्रालय सम्हालेकी छन्, जब देशको कृषि क्षेत्र गम्भीर संकटबाट गुज्रिरहेको छ। सीमित स्रोत, किसानहरूको बढ्दो असन्तुष्टि तथा बिचौलियाद्वारा प्रभावित बजार व्यवस्थापन उनका लागि मुख्य चुनौतीका रूपमा रहेका छन्। अब उनको नेतृत्वमा यी समस्याहरूको समाधान कसरी अघि बढ्छ भन्ने विषयले व्यापक चासो पाएको छ।
